Эрон ва Ироқда мамлакатнинг марҳум олий раҳбари Оятуллоҳ Али Хоманаий билан видолашув маросимлари 4–9 июль кунлари ўтказилади. “Дунё” ахборот агентлигига кўра, 3 июль куни Олий Мажлис Қонунчилик палатаси cпикери Нуриддин Исмоилов бошчилигидаги делегация Эронга бориб, мотам маросимларида қатнашади.
Эроннинг Tasnim ахборот агентлиги хабарига кўра, видолашув маросимларида 30 дан ортиқ давлат ҳамда 90 дан зиёд мамлакатнинг диний пешволари иштирок этиши кутилмоқда. Бу ҳақда Эрон ички ишлар вазири ўринбосари ва мотам тадбирларини ташкил этиш штаби раҳбари Али Акбар Пуржамшидиён маълум қилган.
Эрон Ташқи ишлар вазирлиги расмий вакили Исмоил Боғоий ҳам маросимларда минтақа ва бошқа давлатларнинг расмий делегациялари иштирок этишини тасдиқлаган.
Расмий видолашув маросимлари 4 июль куни Теҳрондаги “Мосалла” мажмуасида бошланади. 5 июль куни шу ерда жаноза намози ўқилади ва пойтахтда оммавий мотам юриши ташкил этилади. Кейинги тадбирлар Қум ва Машҳад шаҳарларида, шунингдек, Ироқнинг Нажаф ва Карбало шаҳарларида давом этади. Дафн маросими 9 июль куни Машҳадда ўтказилиши режалаштирилган.
Эрон томони мотам тадбирларида миллионлаб одам иштирок этиши мумкинлигини билдирмоқда. Шу муносабат билан мамлакат ичида ва хорижда маросимларни мувофиқлаштириш учун махсус штаблар ташкил этилган.
