Саида Мирзиёева “Заковат-Гамбит” шахмат мусобақаси ғолибларини табриклади.
Бу йилги тўртинчи турнирда 2210 нафар шахматчи иштирок этди. Уларнинг 286 нафарини аёл-қизлар ташкил этди.
“Биз ғояларимизга ишончсизлик билдирилган даврдан то халқаро эътирофга эришиш ва шахматчиларимиз билан фахрланишгача бўлган йўлни биргаликда босиб ўтдик. Мен, айниқса қизларимизнинг ғалабаларидан бениҳоя хурсандман, шу ўринда барча қатнашчиларга омад, энг асосийси, ўзларига ишонишларини тилаб қоламан”, деди Президент админстрацияси раҳбари.
23 октябрда Тошкентда IV “Заковат-Гамбит” шахмат турнирининг финал босқичи бўлиб ўтди. Бу йилги беллашувда иштирок этган 2200 дан ортиқ шахмат ихлосмандлари орасидан энг кучли 91 нафар иштирокчи финалга йўл олди.
Финал бешта гуруҳда ўтказилиб, ҳар бир гуруҳдаги шахматчилар юқори натижа учун кураш олиб боришди. Турнир доирасида махсус меҳмонлар — германиялик гроссмейстер Маттиас Блюбаум ва Болгариялик собиқ жаҳон чемпиони Антоанетта Стефанова иштирокчилар билан суҳбатлашиб, ўз тажрибаларини баҳам кўрди.
Бу йилги турнирнинг умумий соврин жамғармаси 620 миллион сўмни ташкил қилди.
