Шимолий Корея 19 апрель куни ўзининг шарқий қирғоқларидан денгиз томон бир нечта баллистик ракеталар учирди. Бу ҳақда Reuters хабар берди.
Бу КХДРнинг 2026 йилда еттинчи, апрель ойида эса тўртинчи баллистик ракета учириш ҳолати ҳисобланади.
“АҚШ Эронга эътибор қаратаётган бир пайтда, Шимол Корея буни ўзининг ядровий ва ракета салоҳиятини ошириш учун олтин вақт деб билади”, деди Кюнгнам университети профессори Лим Эул-чул.
Ҳолат юзасидан Жанубий Корея президенти идораси хавфсизлик бўйича фавқулодда йиғилиш ўтказган. Бундай синовлар БМТ Хавфсизлик кенгашининг Шимолий Корея ракета дастурига қарши резолюцияларини бузади. Пхеньян эса ушбу тақиқларни рад этиб, синовларни ўзининг суверен мудофаа ҳуқуқи деб атамоқда.
“Ракеталар Шимолий Кореянинг шарқий қирғоғидаги Синпо шаҳри яқинидан эрталаб соат 06:10 атрофида учирилган”, дейилади Жанубий Корея ҳарбийлари баёнотида.
Япония ҳукумати ракеталар Корея ярим оролининг шарқий қирғоғи яқинига қулаб тушганини тахмин қилмоқда. Учиришлар Хитой ва АҚШ май ойи ўрталарида бўлиб ўтадиган саммитга тайёргарлик кўраётган бир пайтда амалга оширилди. Саммитда АҚШ президенти Дональд Трамп ва Хитой раиси Си Цзиньпин Шимолий Корея масаласини муҳокама қилиши кутилмоқда.
“Шимолий Корея ядровий қурол ишлаб чиқариш қобилиятида “жуда жиддий” ютуқларга эришди, эҳтимол бу ютуққа янги уранни бойитиш иншооти қўшилган”, деди 15 апрель куни Халқаро атом энергияси агентлиги раҳбари Рафаэл Гросси.
Март ойи охирида Шимолий Корея етакчиси Ким Чен Ин Пхеньяннинг ядровий давлат мақоми ортга қайтмаслигини ва миллий хавфсизлик учун “ядровий тийиб туриш” кучларини кенгайтириш муҳимлигини таъкидлаган эди.
