Telegram орқали сохта профиль очиб, одамларни чув туширган шахс қўлга олинди. Бу ҳақда Ички ишлар вазирлиги хабар берди.
Қайд этилишича, олинган тезкор маълумотлар асосида Наманган вилоятида яшовчи фуқаро Telegram мессенжери орқали ўзига махсус профиль очиб фаолият юритган. У фуқароларнинг Telegram профилларининг иккинчи – сохта нусхасини яратиб, уларнинг танишлари ва яқинларига хабар йўллаш орқали турли миқдордаги пул маблағларини сўраб келган. Келишилган маблағлар эса турли банк пластик карталарга ўтказилгани аниқланган.
Тезкор қидирув тадбирлари давомида гумонланувчига тегишли бўлган мобил телефон аппарати кўздан кечирилганда, Telegram орқали жами 126 нафар фуқаро қора рўйхатга киритилгани аниқланган. Шунингдек, унинг телефонида бир қатор тўлов иловалари мавжудлиги маълум бўлган. Дастлабки маълумотларга кўра, ушбу жиноятлар Навоий, Тошкент шаҳри ва вилояти Фарғона, Қашқадарё, Бухоро ҳамда Сурхандарё вилоятларида содир этилган. Жумладан, Сурхандарё вилоятида ҳам фуқаролар мазкур жиноий ҳаракатлар оқибатида турли миқдордаги пул маблағларидан маҳрум бўлган.
“Telegram аккаунтимни очиб, группаларга кириб, у аккаунтдаги битта инсонни Telegram аккаунтини клон қилиб, ўзлаштириб, унинг номидан танишларига пул сўраб ёзиб, ўзимнинг карта рақамимга пул туширтириб олганман”, дейди гумонланувчи.
Мазкур ҳолат юзасидан Сурхондарё вилояти Ички ишлар бошқармасига келиб тушган мурожаатга асосан тезкор суриштирув ишлари амалга оширилган. Ушбу жиноятни 2004 йилда Наманган вилояти Чортоқ туманида туғилган фуқаро содир этгани аниқланиб, тезкор техник тадбирлар натижасида ашёвий далиллар билан қўлга олинган.
