Наманган ва Сурхондарёда пора олган электр ва газ таъминоти ходимларига жиноят иши қўзғатилди. Бу ҳақда Давлат хавфсизлик хизмати хабар берди.
Маълум қилинишича, Наманган вилояти Косонсой тумани электр тармоқлари корхонасининг икки нафар муҳандиси ўз хизмат мавқейидан фойдаланган ҳолда тадбиркорнинг ишончига кириб, у томонидан ўзига тегишли МЧЖ биносига ўрнатилган, қуввати 50 кВт.ли қуёш панели ва бошқа бажарилган ишлар учун техник шарт ҳужжатларини расмийлаштириб бериш эвазига 17 миллион сўм олган вақтларида ашёвий далиллар билан ушланди.
Сурхондарё вилоятида кузатилган ҳолатда эса “Узунтумангаз” газ таъминоти бўлими ходими 1977-йилда туғилган фуқарога тегишли газ ҳисоблагичнинг носозлиги туфайли юзага келган 23 миллион сўм миқдоридаги қарздорлигини сўндириб бериш ва тегишли тартибда далолатнома расмийлаштирмаслик эвазига 5 миллион сўмни учинчи шахс орқали олган вақтида унинг ноқонуний ҳаракатига чек қўйилди. Шунингдек, ушбу ғайриқонуний ишга унинг 1988-йилда туғилган ҳамкасби ҳам алоқадор экани аниқланди.
Ҳозирда ҳар икки ҳолат юзасидан қонунбузарларга нисбатан жиноят иши қўзғатилиб, тергов ҳаракатлари олиб борилмоқда.
