Қўшма Штатлар президенти Дональд Трамп Ҳиндистондан импорт қилинадиган маҳсулотлар учун божхона тарифларини 50 фоиздан 18 фоизгача пасайтиришга рози бўлди. Бунинг эвазига Деҳли ҳам савдо тўсиқларини камайтириши, шунингдек Россиядан нефтини сотиб олишни тўхтатиши керак бўлади. Reuters хабарига кўра, Ҳиндистон бунинг ўрнига АҚШ ё Венесуэладан “қора олтин” харид қилиши мумкин.
“Бош вазир Моди билан дўстлик ва ҳурмат туфайли, шунингдек, унинг илтимосига кўра, АҚШ–Ҳиндистон савдо келишувига рози бўлдик. У дарҳол кучга киради. Қўшма Штатлар энди ўзаро божларни 25 фоиздан 18 фоизгача туширади”, дея пост қолдирган Дональд Трамп.
Агентликнинг Оқ уй мулозимига таяниб маълум қилишича, АҚШ Россия нефтини сотиб олаётгани учун “жазо чораси” сифатида Ҳиндистон маҳсулотларига қўйилган қўшимча 25 фоизлик бож тарифларини ҳам бекор қилган. Шунингдек, Деҳли Қўшма Штатлардан 500 миллиард доллардан ортиқ миқдорда энергия ресурслари, технология, қишлоқ хўжалиги ва бошқа маҳсулотларини сотиб олишга розилик билдирган.
“Бугун азиз дўстим президент Трамп билан суҳбатлашганимдан хурсандман. Made in India маҳсулотлари энди АҚШ бозорига 18 фоизлик божлар билан киришини мамнуният билан қабул қилдим. Ушбу муҳим қарор учун Ҳиндистоннинг 1,4 миллиард аҳолиси номидан президент Трампга катта раҳмат”, деб ёзиб қолдирган Нарендра Моди.
Канада Осиё-Тинч океани жамғармаси вакили Вина Наджибуллага кўра, бу тўлиқ савдо битимидан кўра божлар бўйича ўзаро кескинликни юмшатишга қаратилган келишув бўлиши мумкин.
Рус нефти омили
Ҳиндистон “қора олтин” бозорининг энг йирик импортчиси бўлиб, у ўз эҳтиёжининг қарийб 90 фоизини ташқи манбалар ҳисобига қоплайди. Хусусан, катта чегирмалар билан сотилган рус нефти мамлакатга энергия харажатларини камайтириш имконини берган. Бироқ сўнгги ойларда Ҳиндистон Россиядан нефть харидини қисқартира бошлаган. Кўрсаткич январда кунлик 1,2 млн баррелни ташкил этган бўлса, февралда 1 млн баррел, мартда эса 800 минг баррелгача тушиши кутилмоқда.
Қўшма Штатлар томонидан жорий этилган бож тарифлари Ҳиндистон молия бозорига жиддий зарар етказган. Шунга қарамай, мутахассисларнинг фикрича, Деҳли хавфларни камайтириш ва савдо алоқаларини диверсификация қилиш сиёсатини давом эттиради.
