АҚШ президенти Дональд Трамп тинчлик келишуви қандай кўринишда бўлишидан қатъи назар, Украинадаги урушни тугатишни мақсад қилган. Бу ҳақда Politico хабар берди.
Ҳозирда АҚШнинг урушни тўхтатиш учун тайёрлаган 28 бандли режаси муҳокама қилинмоқда. Унда Донбассни Россияга бериш, армия сонини қисқартириш, НАТОга аъзо бўлмаслик каби Россия фойдасига оғувчи талаблар мавжуд. Оқ уй расмийлари тинчлик режаси борасида Трампда “қизил чизиқлар” йўқлигини таъкидлади. Асосий мақсад — икки томон рози бўлса ва уруш тугаса кифоя.
“Пировард мақсад — тинчлик. Эришиш мумкин бўлган энг муҳим нарса шу. Урушни тўхтатиш, қотилликни тўхтатиш. Трамп асосан шуларни хоҳламоқда”, деди Оқ уйнинг юқори лавозимли амалдори.
Ҳозирда 28 бандли режага ўзгартиришлар киритилмоқда. Украина янги вариантда унинг ҳам манфаатлари акс этишини маълум қилган.
АҚШнинг ўтган ҳафта эълон қилинган таклифи Украинадан катта ҳудудий ён беришларни, жумладан, бутун Донбасс, Луганск ва Қримни топширишни, шунингдек, ҳеч қачон НАТОга қўшилмасликка рози бўлишни талаб қилган эди. Таклифнинг Россия талабларига мойиллиги баъзи республикачилар орасида Трампнинг урушни тўхтатишга бўлган эътибори Украина учун ноқулай келишувга олиб келишидан хавотир уйғотди.
“Жабрланувчига босим ўтказиш ва тажовузкорни тинчлантириш тинчлик келтиради, деб ўйлайдиганлар ўзларини алдамоқда”, деди сенатор Митч Макконнелл.
Трамп узоқ вақтдан бери ўзини урушда “воситачи” деб билади ва нейтрал позицияни сақлашга интилади.
“Президент Трампнинг мақсади — урушни тугатиш. Агар у президент бўлганида бу уруш ҳеч қачон содир бўлмас эди, бу уруш миллионлаб одамларнинг ҳаётига зомин бўлди. У барқарор ва қатъий тинчлик ўрнатиш орқали янада кўпроқ инсонлар ҳалок бўлишининг олдини олишга ҳаракат қилмоқда”, дейилади Оқ уй хабарида.
