Бугун, 26 ноябрь куни Тошкент шаҳар Шайхонтоҳур туманида жойлашган 2 қаватли дўкон ёниб кетди. Бу ҳақда пойтахт Фавқулодда вазиятлар бошқармаси хабар берди.
Қайд этилишича, соат 14:54 да 112 тизими орқали Шайхонтоҳур тумани, Истироҳат кўчасида жойлашган икки қаватли бинода ёнғин содир бўлгани тўғрисида шаҳар ФВБга хабар тушган. Шунга кўра, 4 та ёнғин-қутқарув бўлинмалари соат 15:03 да ҳодиса жойига етиб бориб, ёнғин соат 15:09 да ўраб олинган ва соат 15:15 да бартараф этилган.
Билдирилишича, ёнғин оқибатида бинонинг тахминан 100 квадрат метр майдонда том ва ички қисми ёниб зарарланган. Ёнғин-ўчирувчиларнинг профессионал ҳаракатлари натижасида ёнғинни кенг тарқалишининг олди олинган. Ҳозирда ёнғин сабаби ва зарари аниқланмоқда. Ҳодиса оқибатида тан жароҳати олганлар тўғрисида хабар тушмаган.
