Жиноят ишлари бўйича Самарқанд шаҳар суди томонидан ўзини Ўзбекистон бош вазирининг ёрдамчиси сифатида таништириб, катта миқдордаги пулни ўзлаштирган шахсга суд ҳукми ўқилди.
Аниқланишича, 1951-йилда туғилган, Тошкент шаҳрида яшовчи, муқаддам 9 маротаба судланган И.X. 2025-йилнинг 5 июль куни “Жомбой дон маҳсулотлари” акциядорлик жамияти раиси вазифасини бажарувчи Ш.А.га қўнғироқ қилиб, ўзини Ўзбекистон Республикаси бош вазири ёрдамчиси Шуҳрат Азизов сифатида таништирган. У суҳбат давомида ўзини ишончли шахс сифатида кўрсатиш учун давлат раҳбарияти билан яқин алоқада эканини, турли масалаларни ҳал қила олишини билдирган.
Мулоқот мобайнида Ш.А.нинг ишончини қозониб, турмуш ўртоғининг буйраги касалланганлиги сабабли уни зудлик билан Германияга олиб бориш ва жарроҳлик амалиётини ўтказиш лозимлигини айтиб, 100 миллион сўм ўтказиб беришини сўраган. Раис унинг гапларига ишониб, аввал 40 миллион, кейинроқ яна 20 миллион сўмни И.X.нинг пластик картасига ўтказиб берган.
И.X. бир неча кундан сўнг Ш.А.га яна қўнғироқ қилиб, бош вазир билан гаплашганини ва уни “Жомбой дон маҳсулотлари”га доимий раис вазифасига тайинлашга рози қилганини айтади. Бунинг эвазига эса 15 минг АҚШ доллари талаб қилган. Шунингдек, яқин орада бош вазирнинг Самарқанд вилоятига ташрифи борлигини, у ҳам бирга келишини, шунда учрашишини маълум қилган. Жабрланувчи бунча пули йўқлигини, аммо бир амаллаб 80 миллион сўм топиши ва йўловчи такси орқали юборишини билдирган.
Судланувчи билан мулоқот давомида унинг сўзларидан шубҳаланган Ш.А. вилоят ҳокимлигида қишлоқ хўжалиги котибияти мудири вазифасида ишловчи таниши А.га қўнғироқ қилиб, ундан Азизов Шуҳрат ким эканлигини сўрайди. А. эса бунақа шахсни танимаслигини, Вазирлар Маҳкамасидан ҳам суриштирганида бунақа шахс йўқлигини маълум қилишганини айтади.
Бу гаплардан сўнг Ш.А. фирибгарлик аломатларини сезиб, Самарқанд вилояти Иқтисодий жиноятларга қарши курашиш департаментига ариза билан мурожаат қилган.
Унинг аризасига асосан департаментнинг Самарқанд вилояти ва Тошкент шаҳар бошқармалари ходимлари томонидан ДХХ Самарқанд вилояти бўйича бошқармаси ҳамда вилоят ИИБ ходимлари билан ҳамкорликда 13 июль куни Юнусобод туманида ўтказилган тезкор тадбирда И.X. келишилган 15 минг АҚШ долларидан 80 миллион сўм пулларни И.М. орқали олган вақтида ушланади.
Суд ҳукми билан И.X. Жиноят кодексининг 25, 168-моддаси 3-қисми “а, б” бандлари ҳамда 28, 211-моддаси 2-қисми “б” банди бўйича айбдор деб топилди. Унга нисбатан базавий ҳисоблаш миқдорининг 60 баравари миқдорида, яъни 22,5 миллион сўм миқдорида жарима ҳамда 2 йил муддатга озодликдан маҳрум қилиш жазоси тайинланди. Жазони қаттиқ тартибли колонияларда ўташ белгиланди.
