Эрон президенти Масъуд Пезешкиён урушни тугатиш учун асосий шартларни маълум қилди. У мамлакат ҳуқуқларини тан олиш, компенсация тўлаш ва хавфсизлик кафолатлари беришни ўз ичига олади. Бу ҳақда Пезешкиён ўзининг X ижтимоий тармоғида маълум қилди.
“Россия ва Покистон раҳбарлари билан суҳбатда Эроннинг минтақада тинчлик тарафдори эканини яна бир бор тасдиқладим. Сионистлар режими ва АҚШ бошлаган бу урушни тугатишнинг ягона йўли — Эроннинг қонуний ҳуқуқларини тан олиш, репарациялар тўлаш ва келажакдаги тажовузга қарши қатъий халқаро кафолатлар берилишидир”, деб ёзди Эрон президенти.
АҚШ президенти Дональд Трамп Эронга қарши ҳарбий операция тез орада тугаши мумкинлигини айтмоқда. У зарба бериш учун “деярли нишонлар қолмагани”ни маълум қилган. Эрон Ислом инқилоби қўриқчилари корпуси эса “уруш қачон тугашини АҚШ эмас, улар ҳал қилиши”ни таъкидлаган.
АҚШ ва Исроил 28 февраль куни Эронга қарши кенг кўламли ҳарбий операция бошлади. Тель Авив бу операциянинг мақсади Теҳроннинг ядровий қуролга эга бўлишига йўл қўймасликка қаратилганини билдирди. АҚШ Эрон ҳарбий-денгиз флоти ва мудофаа саноатини йўқ қилиш билан таҳдид қилди, Трамп мамлакат фуқароларини режимни ағдаришга даъват этди.
Ҳужумнинг биринчи кунидаёқ Эрон олий раҳнамоси Оятуллоҳ Али Хоманаий ўлдирилди. Мамлакатда 40 кунлик мотам эълон қилинди. Хоманийнинг ўрнини унинг ўғли Можтаба Хоманаий эгаллади. Бунга жавобан Эрон Исроил ҳудудига ҳамда Яқин Шарқдаги Америка ҳарбий объектларига зарбалар йўлламоқда.
