Британияликларнинг кўпчилиги бош вазир Кир Стармер истеъфога чиқиши керак, деб ҳисобламоқда. Бунга америкалик миллиардер Жеффри Эпштейн билан дўст бўлган Питер Манделсоннинг АҚШга элчи этиб тайинланиши билан боғлиқ можаро сабаб бўлган. Politico нашри ва Public First тадқиқот компаниясининг қўшма сўрови натижалари шуни кўрсатмоқда, дея хабар бермоқда “ТАСС”.
Британияликларнинг камида 52 фоизи бош вазир лавозимини тарк этиши кераклигини, 19 фоизи у қолиши, аммо унинг маслаҳатчилари истеъфога чиқиши лозимлигини айтган. Унинг истеъфосини истаётганларнинг 47 фоизи Манделсон билан боғлиқ можародан ташқари, ҳукумат раҳбариятини алмаштириш учун бошқа сабаблар ҳам борлигини таъкидлаган. Онлайн сўров 6-9 февраль кунлари ўтказилиб, унда Буюк Британиянинг 18 ёшдан ошган 2 мингдан ортиқ фуқароси иштирок этган.
Британия бош вазири хатосини тан олган, бироқ мухолифатнинг чақириқлари ва партия аъзоларининг танқидларига қарамай, истеъфога чиқишни рад этган. Бироқ можаро туфайли Манделсон номзодини таклиф қилган Буюк Британия бош вазири девони раҳбари Морган Максуини ҳамда Стармернинг жамоатчилик билан алоқалар хизмати директори Тим Аллан истеъфога чиққан.
