АҚШ Мудофаа вазирлиги (Пентагон) Америка қуруқликдаги қўшинларини Эронга юбориш эҳтимолига фаол тайёргарликни бошлади. Бу ҳақда муҳокамалар жараёнидан хабардор бир нечта манбаларга таяниб, CBS хабар берди.
Телеканал суҳбатдошларига кўра, юқори мартабали ҳарбий мулозимлар аллақачон ушбу сценарий бўйича аниқ сўровлар юборган, чунки Президент Дональд Трамп Эронга қарши урушда шу каби қадамларни кўриб чиқмоқда.
Тайёргарлик доирасида америкалик ҳарбийлар, хусусан, Эрон аскарлари ва ҳарбийлаштирилган тузилмалар жангариларини қўлга олиш ҳамда асирлар қаерга юборилишини белгилаш бўйича йиғилишлар ўтказган. Режалаштириш жараёнида Қуруқликдаги қўшинларнинг тезкор ҳаракат қилиш кучлари ва Денгиз пиёдалари корпусининг экспедицион бўлинмалари иштирок этмоқда.
Шу билан бирга, Трампнинг ўзи 19 март куни журналистларнинг саволига жавоб берар экан, аввалига Эронда қуруқликдаги операция ўтказиш нияти йўқлигини айтди, аммо дарҳол: “Агар мен буни қилганимда ҳам, сизга албатта айтмаган бўлардим”, деб қўшиб қўйди.
Ушбу вазият фонида АҚШ Яқин Шарқдаги ҳарбий иштирокини кучайтирмоқда. Икки нафар америкалик мулозимнинг маълумотига кўра, шу ҳафта бошида Калифорниядан учта ҳарбий кема ва экспедицион бўлинманинг қарийб 2200 нафар денгиз пиёдаси йўлга чиққан. Бу уруш бошланганидан бери минтақага юборилган иккинчи шундай бўлинмадир, деб қайд этади CBS.
“Reuters”га кўра, Трамп Эронда денгиз пиёдаларидан фойдаланишнинг бир неча вариантларини кўриб чиқмоқда: Ҳормуз бўғози орқали танкерларнинг хавфсиз ўтишини таъминлаш учун Эрон қирғоқларида позицияларни эгаллаш, Харг оролини (Эрон нефть экспортининг асосий маркази) қўлга олиш, шунингдек, юқори даражада бойитилган уран захираларини қўлга киритиш бўйича операция.
Оқ уй агентлик билан суҳбатда қуруқликдаги қўшинларни юбориш бўйича ҳали якуний қарор қабул қилинмаганини, бироқ Президент “барча вариантларни донолик билан ўйлаб кўраётганини” таъкидлаган. Ҳозирда АҚШнинг Яқин Шарқдаги ҳарбий гуруҳи таркиби қарийб 50 минг аскарни ташкил этмоқда.
