Тошкент шаҳридаги “Янги Ўзбекистон” боғида Наврўз умумхалқ байрамига бағишланган тантанали маросим бўлиб ўтди. Унда Шавкат Мирзиёев иштирок этиб, бутун халқни Наврўз байрами билан табриклади.
Давлат раҳбари ўз нутқида Наврўзнинг чуқур маънавий аҳамиятига тўхталиб, ушбу айём табиат уйғониши, янгиланиш ва покланиш рамзи эканини таъкидлади. Шунингдек, бу йил Наврўз Рамазон ҳайити билан бир вақтга тўғри келаётгани алоҳида қайд этилди.
More stories“Бугун бамисоли икки азим дарё туташмоқда – Наврўз байрамини муборак Рамазон ҳайити билан бирга нишонламоқдамиз”, деди президент.
Президент мамлакатда олиб борилаётган бунёдкорлик ишлари ҳақида ҳам тўхталиб, барча ҳудудларда янги лойиҳалар амалга оширилаётгани, инфратузилма ривожланиб бораётганини қайд этди. Янги иш ўринлари яратиш, камбағалликни қисқартириш ва ижтимоий ҳимояни кучайтириш борасида изчил ишлар олиб борилаётгани таъкидланди.
Давлат раҳбари деҳқон ва фермерларнинг меҳнатини алоҳида эътироф этиб, улар халқ фаровонлигида муҳим ўрин тутишини қайд этди. “Сизларнинг олижаноб меҳнатингиз билан халқимизнинг ризқ-у насибаси бутун бўлади”, деди у.
Шунингдек, нутқда ёшлар масаласига алоҳида эътибор қаратилиб, улар Янги Ўзбекистон тараққиётининг асосий кучи экани таъкидланди. Президент ёшларни билим олишга, замонавий касб ва кўникмаларни эгаллашга чақирди.
“Азиз фарзандларим, бугун Учинчи Ренессанс бунёдкорлари бўлишдек улкан бахт ва шараф сизларга насиб этмоқда”, деди давлат раҳбари.
Нутқ давомида миллатлараро тотувлик ва ҳамжиҳатлик масалаларига ҳам тўхталиб ўтилди. Президент Ўзбекистонда турли миллат ва элат вакиллари биргаликда яшаб, Наврўзни аҳилликда нишонлаётганини алоҳида таъкидлади.
Давлат раҳбари сўзининг якунида яна бир бор барча юртдошларни Наврўз билан табриклаб, юртимизга тинчлик, барака ва фаровонлик тилади.
