Эрон АҚШ ва Исроил билан зиддиятлар кучайган бир пайтда нақд пулга талаб ортиши фонида мамлакат тарихидаги энг йирик — 10 миллион риал (7,6 доллар) қийматидаги банкнотни муомалага киритди. Бу ҳақида The Financial Times хабар қилди.
“Янги пушти рангли банкнотнинг олд томонида IX асрда қурилган Язд шаҳридаги жоме масжиди, орқа томонида эса 2500 йиллик тарихга эга Бам қалъаси тасвирланган. Бу — февраль ойи бошида чиқарилган 5 миллион риаллик (3,8 доллар) банкнот ўрнини эгаллаган, айни пайтдаги муомаладаги энг йирик пул бирлигидир”, дейилади нашр материалида.
Эронда банкоматлар олдида узун навбатлар юзага келмоқда, электрон тизимларнинг ишдан чиқиши мумкинлиги ҳақидаги хавотирлар туфайли нақд пул захиралари тез тугаб қолмоқда. Инфратузилма объектларига, жумладан, Эроннинг энг йирик давлат банкларидан бири бўлган “Сепаҳ” биносига зарба берилгани аҳоли орасида ташвишга сабаб бўлди.
Мамлакат иқтисодиёти санкциялар, инфляция ва миллий валюта қадрининг пасайиши туфайли босим остида қолмоқда: йиллик инфляция 47,5 фоизга етган, озиқ-овқат маҳсулотлари нархи эса 105 фоиздан кўпроққа ошган. Расмийлар нақд пулсиз ҳисоб-китоблар сақланиб қолишини таъкидламоқда, бироқ нақд пул беришдаги чекловлар аҳоли хавотирини кучайтириб, унга бўлган талабни янада рағбатлантирмоқда.
