Эрон ракета ҳужуми Саудия Арабистонидаги Prince Sultan авиабазасида жойлашган АҚШ ҳарбий самолётларига зарар етказган. Бу ҳақда The Wall Street Journal нашри икки америкалик амалдорга таяниб хабар берган, Reuters ҳам ушбу маълумотни келтирган.
Маълумотларга кўра, ҳужум оқибатида АҚШ Ҳарбий-ҳаво кучларига қарашли ерда турган бешта ҳавода ёқилғи қуйиш самолёти шикастланган. Нашр қайд этишича, самолётлар бутунлай йўқ қилинмаган, айни пайтда улар таъмирланмоқда. Ҳужумда қурбонлар қайд этилмаган.
Бу ҳолат сўнгги кунларда йўқотилган ёки шикастланган америкалик ёқилғи қуйиш самолётлари сонини камида еттитага етказган. Аввалроқ, Ироқ осмонида икки KC-135 самолёти билан боғлиқ ҳодиса ҳам юз берган эди.
Ҳозирча АҚШ Марказий қўмондонлиги – CENTCOM мазкур зарба юзасидан расмий изоҳ бермаган. Reuters ҳам WSJ келтирган маълумотни мустақил равишда тўлиқ тасдиқлай олмаганини қайд этган.
Эслатиб ўтамиз, аввалроқ АҚШ Марказий қўмондонлиги Ироқ ғарбида қулаган KC-135 ҳавода ёқилғи қуйиш самолёти бортида бўлган барча 6 нафар экипаж аъзоси ҳалок бўлганини расман тасдиқлаган эди.
