Эронга яқин деб баҳоланаётган «Hanzala» хакерлар гуруҳи исроиллик таҳлилчи Раз Зиммт номига кескин мазмундаги таҳдидли мурожаат эълон қилди.
Мурожаатда Раз Зиммт «Эрон масаласи бўйича фикр билдиргани» учун нишонга олингани айтилади. Матнда унинг электрон почтаси ва бошқа шахсий маълумотларига кирилгани, шунингдек 50 мингдан ортиқ махфий электрон хатлар қўлга киритилгани даъво қилинади.
Хакерлар бу хатлар орасида гўёки Исроил махсус хизматлари билан боғлиқ молиявий маълумотлар, Эронни беқарорлаштиришга қаратилган режалар, Ризо Паҳлавий билан боғлиқ операция материаллари, Эроннинг махфий объектларига оид маълумотлар ва хавфсизлик тизими вакиллари билан ёзишмалар борлигини билдирган.
Ҳужжатларга кўра, Моссад томонидан ажратилган ойлик 300 минг доллар бюджет Ризо Паҳлавий билан ҳамкорликдаги Эронни беқарорлаштириш режаларига йўналтирилган.
Шунингдек, мурожаатда Эрон билан ҳамкорлик қилгани айтилган шахсларнинг шахси аниқлангани, улар ушлангани ва сўроқ қилинаётгани ҳам даъво қилинган.
Матн сўнгида бу ҳодиса «Эрон ҳақида бепарво баёнот бермоқчи бўлган барча учун огоҳлантириш» экани таъкидланган. Муаллифлар «ахборот – ҳақиқий куч» эканини билдириб, энди барча маълумотлар ўз қўлларида эканини иддао қилган.
