Туркиянинг биринчи, тўлиқ маҳаллий ресурслар ҳисобига “Фергани Узай Текноложилери” компанияси томонидан ишлаб чиқарилган орбитал транспорт кемаси YTA FGN-TUG-S01 фазога учирилиб, ўз миссиясини бошлади. Бу ҳақда Anadolu хабар берди.
Baykar компанияси маълумотига кўра, компания раиси ва техник раҳбари Селчук Байрактар томонидан асос солинган “Фергани Узай Текноложилери” компанияси ўзининг FGN-TUG-S01 орбитал транспорт воситасини 2025 йил 28 ноябрь куни АҚШнинг Ванденберг ҳаво базасидан SpaceX Falcon 9 ракетаси ёрдамида муваффақиятли орбитага учирган. FGN-TUG-S01 Туркия вақти билан соат 23:05 да ракетадан ажралиб, дарҳол ўзининг биринчи телеметрия маълумотларини узатиб, расман миссияни бошлаган.
Дунёда биринчи
FGN-TUG-S01 Туркиянинг биринчи орбитал шатакчиси бўлиб, у ўзининг гибрид ракета двигательини бевосита орбитада ишга туширадиган биринчи транспорт воситаси ҳисобланади.
- Ушбу хавфсиз ва самарали гибрид ҳаракатлантирувчи тизим туфайли кема сунъий йўлдошларни турли орбиталарга кўчириш ва уларнинг хизмат муддатини узайтириш ишлари билан шуғулланади.
- Дастлаб пастки орбитада (тахминан 500 километр) ишлайдиган бу восита, келажакда компания сунъий йўлдошларини 1000 километрдан ортиқ юқори орбиталарга кўтариш учун фойдаланилади.
Маҳаллий технологиялар
Туркиянинг илк орбитал транспорт кемасининг борт компьютери, авионикаси, қувват тақсимлаш блоклари ва термал назорат каби муҳим тизимлари тўлиқ “Фергани Узай” муҳандислари томонидан мамлакатда ишлаб чиқилган. Мазкур муваффақиятли учириш билан мамлакат гибрид двигателни орбитада синовдан ўтказган биринчи давлат бўлмоқда.
“Бу миссия ‘Улуғбек миллий глобал навигация тизими’ учун муҳим инфратузилма базасини яратади ва келажакдаги сунъий йўлдош туркумларимизни яратишга йўл очади. Беш йил ичида 100 дан ортиқ сунъий йўлдошни орбитага жойлаштиришни мақсад қилганмиз”, дейди лойиҳа раҳбари Селчук Bayraktar.
