22 ноябрь куни Венесуэла Президенти Николас Мадуро Россия Президенти Владимир Путиндан туғилган куни муносабати билан табрик хати олди. Бу ҳақда Венесуэла Ташқи ишлар вазири Иван Хиль ўзининг Telegram-каналида маълум қилди.
Вазирнинг айтишича, ушбу мактуб икки давлат ўртасидаги “муносабатларнинг стратегик характери”ни тасдиқлайди ва Мадуорнинг Венесуэлани бошқаришдаги етакчилик ролини қайд этади.
“Биз бу биродарлик ва бирдамлик ифодасини қадрлаймиз”, дейди Ташқи ишлар вазири.
Шунингдек, у Венесуэла Президенти номидан Каракаснинг Москва билан биргаликда хавф-хатарлардан холи дунё барпо этишга содиқлигини билдирган.
Қайд этиш жоиз, ҳозирда Венесуэла ва АҚШ ўртасида муносабатлар кескин ёмонлашган. Ушбу вазият фонида жорий йилнинг 31 октябрь куни The Washington Post газетаси Мадуро Путиндан ёрдам сўраб хат йўллагани ҳақида хабар берган. Хатда Венесуэла етакчиси Россиядан мамлакатга ракеталар ва маблағ беришни, шунингдек, самолётларни таъмирлашни сўраган.
Кейинроқ эса “Politico” ўз манбаларига таяниб, АҚШ Венесуэла Президенти Николас Мадурони Россияга қочишга мажбур қилиши мумкинлиги ҳақида ёзди. Манбаларга кўра, Дональд Трамп маъмурияти Николас Мадуро ҳокимиятдан кетиши ва мамлакатни тарк этиши мумкин бўлган сценарийни муҳокама қилмоқда. Оқ уй амалдорларининг айтишича, унга Россияга ихтиёрий сургун сифатида боришга “яшил чироқ” берилиши эҳтимоли кўрилмоқда. Шунингдек, Туркия ёки Куба вариантлари ҳам кўриб чиқилмоқда. Бироқ АҚШ Президентининг айрим маслаҳатчилари Мадурога мамлакатдан чиқиб кетишга рухсат бериш ўрнига уни қўлга олиш ва АҚШда суд қилиш тарафдори.
