Ўзбекистон U-20 терма жамоаси аъзолари Садриддин Ҳасанов ва Сайфиддин Содиқов Португалиянинг “Брага” клуби футболчиларига айланди. Бу ҳақда клуб матбуот хизмати хабар берди.
Маълумот учун, футболчилар 18 ёшда, иккаласи ҳам 2025 йилда 17 ёшгача бўлган футболчилар ўртасидаги Осиё Кубогида ғолиб чиққан Ўзбекистон ўсмирлар терма жамоасида тўп сурган. Ҳасанов турнирнинг энг яхши футболчиси деб топилган ва Саудия Арабистонига қарши кечган финал учрашувида (2:0) голлардан бирига муаллифлик қилган.
Иккала футболчи ҳам жорий мавсумда Ўзбекистон Суперлигасида дебют қилди. Содиқов “Андижон” сафида учта ўйинда майдонга тушган бўлса, Ҳасанов Тошкентнинг “Бунёдкор” клуби таркибида 6 та учрашувда қатнашди.
“Брага” (Sporting Clube de Braga) — Португалиянинг шимолидаги Брага шаҳрига тегишли бўлган, мамлакатнинг энг машҳур ва кучли профессионал футбол клубларидан биридир. У Португалия олий дивизиони – Премьер лигада иштирок этади ва “катта учлик” (“Бенфика”, “Порту”, “Спортинг”)дан кейинги “тўртинчи гранд” сифатида эътироф этилади. Клуб Европада ёш иқтидорларни кашф қилиш ва кучли скаутлик тизими билан жуда машҳур ҳисобланади.
