Саудия Арабистонининг “Ал-Наср” жамоаси ҳужумчиси Садио Мане собиқ футболчи ва поткаст олувчи Рио Фердинанд билан суҳбатда жамоадоши Криштиану Роналдуни юксак баҳолаб, португалиялик юлдузни авлодда бир марта учрайдиган профессионаллардан бири деб атади.
Сенегаллик футболчи “Манчестер Юнайтед”нинг собиқ афсонаси билан бирга ўйнаш тажрибаси ҳақида гапирди:
“Криштиану дунёдаги барча футболчилар учун намуна. Мен унга ўхшаган бошқа ўйинчини кўрмаганман. У ҳар куни ишлашга, ғалаба қозонишга чанқоқ, ҳатто 40 ёшда ҳам”, дейди Садио Мане.
Шунингдек, Садио Мане Роналдуни телевизорда томоша қилган пайтларида у ҳақда кўп эшитганини, аммо “Ал-Наср”га ўтиб, унинг ҳақиқий профессионаллик даражасига бевосита гувоҳ бўлганини қўшимча қилди.
“У билан машғулотларга биринчи бўлиб келади, одатдагидек, охирги бўлиб кетади. Машғулот унинг қонида. Жамоага Роналдунинг таъсири алоҳида” , дея қўшимча қилди Мане.
Садио Мане ва Криштиану Роналду “Ал-Наср” сафида ҳозирга қадар 91 учрашувни бирга ўтказган. Саудия Про-лигасида улар ҳали йирик соврин қўлга киритмаган бўлса-да, жамоадаги муҳим ҳужум жуфтлигига айланган. Жуфтлик жами 16 та голга ҳисса қўшган бўлиб, улардан 13 тасини Роналду урган.
Маълумот учун, Роналду 2022 йилда “Ал-Наср”га келган бўлса, Мане 2023 йилда “Бавария” билан бир мавсумдан кейин Саудия клубига қўшилган эди.
