Украина президенти Владимир Зеленский мамлакатининг келажаги Европа Иттифоқи (ЕИ)қўлида эканини айтди. У бу ҳақда Euronews нашрига берган интервьюсида маълум қилди.
Зеленский интервью давомида ЕИга қўшилиш истагини яна бир бор тасдиқлаган. Унга 2030-йилгача Украина Европа Иттифоқига аъзо бўлиш эҳтимоли ҳақида савол берилганда, у бу ҳозирча “илмий фантастикага ўхшаш” туюлишини билдирган. Аммо у Украина бу санадан аввалроқ Иттифоққа қўшилишига ишонишини таъкидлаган. Президент бу жараён адолатли бўлиши кераклигини айтган.
More stories“Барчаси ҳалол тарзда, Украина ўзини ҳимоя қилаётган ва уруш тугаган пайтда бўлишини истайман”, деган у.
Зеленскийнинг мазкур баёноти ЕИнинг йиллик кенгайиш ҳисоботи даврига тўғри келган. Ҳисоботда Украина аъзо бўлиш йўлида катта қатъият кўрсатгани эътироф этилган. Бироқ коррупцияга қарши курашда ҳали ҳал қилиниши керак бўлган муаммолар борлиги қайд этилган.
Зеленский мамлакат ЕИ аъзолигига тайёргарлик учун барча чораларни кўраётгани, жумладан, коррупцияга қарши тизимни кучайтираётганини таъкидлаган. Ҳозирча Европа комиссияси фикрича, Украина ЕИ билан музокараларни бошлаш учун зарур бўлган олтита йўналишдан учтасида талабларни бажарган.
Зеленский интервью давомида ЕИнинг Россияга қарши жорий этган сўнгги санксиялар пакетини олқишлаган. Унга кўра, бу санксиялар Россия иқтисодиётига босимни кучайтириб, уруш бюджетини қисқартиришга ёрдам беради.
“Европа етакчиларининг ёрдамисиз бизга жуда қийин бўларди. Улар газ импорти ва энергия тизимини тиклаш учун жиҳозлар етказишда ҳам ёрдам бермоқда”, деган Зеленский.
Украинанинг энергия инфратузилмаси ҳозирда Россия дрон ва ракета ҳужумларидан жиддий зарар кўрмоқда. Мамлакат Украина—Россия урушининг тўртинчи қишига тайёргарлик кўрмоқда.
