Украинада Владимир Зеленский Президент экан, мамлакат ҳудудлари тинчлик эвазига берилмайди. Бу ҳақда Президент идораси раҳбари Андрей Ермак кеча, 27 ноябрь куни “The Atlantic” мухбири Саймон Шустер билан суҳбатда маълум қилди.
“Бугун бирон ақл-идрокка эга одам ҳудудларни бериш бўйича ҳужжатни имзоламайди. Зеленский Президент экан, ҳеч ким ҳудудларни беришимизни кутмасин. У ҳудудларни бериш бўйича ҳужжатни имзоламайди. Конституция буни тақиқлайди. Ҳеч ким буни қила олмайди”, дея урғулаган Ермак.
Унинг сўзларига кўра, Украина фақат Россия томонидан назорат қилинадиган ҳудудларни ажратиб турувчи чизиқ қаерда бўлиши мумкинлиги масаласини муҳокама қилишга тайёр.
“Ҳозирги пайтда биз ҳақиқатан ҳам муҳокама қиладиган ягона нарса – бу алоқадор чизиқни белгилаш. Шу ишни амалга оширишимиз керак”, деган Президенти идораси раҳбари.
Саймон Шустернинг қайд этишича, Ермак бу сафар Россия-Украина можаросини тинч йўл билан ҳал қилиш бўйича кейинги музокарада Украинанинг позициясини биринчи марта баён қилган.
Олдинроқ, Украина АҚШ билан музокараларда Америка томони таклиф қилган тинчлик режасидаги кўпчилик шартларни келишган. АҚШ Президенти Дональд Трампнинг сўзларига кўра, тинчлик режасидаги 28 банд дастлаб 22 тага қисқартирилган. Шу билан бирга, ҳудудлар масаласи ва Украинанинг НАТОга қўшилиши ҳануз ҳал қилинмаган бўлиб, бу масалалар Зеленский ва Трамп учрашувида муҳокама қилиниши кутилмоқда.
Америка ҳукумати Украина АҚШ билан тинчлик бўйича келишувни 27 ноябргача имзолашини кутган. Андрей Ермак Зеленский имкон қадар тезроқ Трамп билан учрашмоқчи эканини айтган, аммо ҳозирга қадар Президентлар учрашмаган. Трамп ўз вакилларига Украина ва Россия етакчилари билан учрашиб, режа бўйича келишишни топширган.
