Бразилия терма жамоаси бош мураббийи Карло Анчелотти Неймар ва Винисиус Жуниорни огоҳлантирди. Италиялик мутахассис Esporte Record нашрига берган интервьюсида 2026-йилги Жаҳон чемпионатига 100% тайёр футболчиларни олиб кетишини маълум қилди. Унга кўра, ҳатто Неймар ёки Винисиус Жуниор каби футболчилар учун ҳам терма жамоада жой кафолатланмаган.
“Неймар 100% тайёр бўлиши керак. Рўйхатимда кучли футболчилар кўп ва мен айнан тўлиқ тайёр бўлганларини танлайман. Бу фақат Неймар ҳақида эмас, бу Винисиусга ҳам тегишли. Агар Винисиус 90% тайёр бўлса, мен 100% тайёр бўлган бошқасини чақираман. Чунки бу жамоада, айниқса ҳужумда, рақобат жуда кучли. Бизда етарлича яхши ҳужумчилар бор”, деб Карло Анчелоттининг сўзларини келтирди ESPN нашри.
Маълумот учун, Неймар 2025 йил бошида “Сантос”га қайтиб, фаолиятини қайта тиклашни мақсад қилган эди. Аммо бунга эришиш осон бўлмади: 25 ўйин, 7 та гол. Шунингдек, ҳужумчи мавсумнинг катта қисмини жароҳат сабаб ўтказиб юборди. Мазкур ҳолатлар ортидан Неймар жамоанинг кўплаб йиғинларини ўтказиб юборди.
2026-йилги Жаҳон чемпионати 11 июндан 19 июлгача АҚШ, Канада ва Мексика майдонларида бўлиб ўтади. Мусобақада 48 та терма жамоа бош соврин учун кураш олиб боради. Мундиалга қуръа ташлаш маросими 5 декабрь куни АҚШ пойтахти Вашингтондаги “The Kennedy Center” мажмуасида ўтказилади.
