Россия Ҳиндистоннинг 200 нафардан ортиқ фуқаросини Украинага қарши урушда иштирок этиш учун ёллагани маълум бўлди. Бу ҳақда BBC хабар берди.
Ҳиндистон ҳукуматига кўра, урушда камида 26 нафар ҳиндистонлик ҳалок бўлган, яна 7 нафари бедарак йўқолган. Шу пайтгача 100 нафардан ортиқ фуқаро Ҳиндистонга қайтарилган. Айни пайтда тахминан 50 нафар ҳиндистонликни ватанга қайтариш масаласида Москва билан музокаралар олиб борилмоқда.
Жабрланганларнинг қариндошлари ёллаш жараёни воситачилар ва агентлар орқали амалга оширилганини айтди. Улар ёш йигитларни Россияда қонуний иш, юқори маош ва яшаш шароитлари ваъдалари билан жалб қилган. Бироқ Ҳиндистондан келганлар Россияга етиб боргач, мазмунини тушунмаган рус тилидаги шартномаларни имзолашга мажбур қилинган ва шундан сўнг тўғридан тўғри жанговар ҳудудга юборилган.
2024 йил июлида Россия президенти Владимир Путин урушда иштирок этиш учун ёлланган барча Ҳиндистон фуқароларини Россия армиясидан озод қилишга ваъда берган. Бу баёнот Ҳиндистон бош вазири Нарендра Модининг Москвага ташрифи чоғида билдирган талабидан сўнг янграган. Ўша йил сентябрда 45 нафар ҳиндистонлик Россия армияси сафидан чиқарилган.
Украинага қарши урушда иштирок этиш учун чет эл фуқароларини ёллаш фақат Ҳиндистон билан чекланмайди. Урушда Россия томонида Непал, Сомали, Индонезия, Сурия, Куба, Сербия, Шри-Ланка, Хитой ва айрим Марказий Осиё давлатларидан ёлланма жангчилар қатнашаётгани ҳақида ҳам маълумотлар мавжуд.
