Андижонда катта миқдордаги олтинни божхонадан автомобиль эҳтиёт қисмларига яшириб ўтказмоқчи бўлган шахс қўлга тушди. Бу ҳақда Давлат хавфсизлик хизмати хабар қилди.
Қайд этилишича, “Дўстлик” чегара божхона пости яқинида Фарғона вилоятида яшовчи, 1994-йилда туғилган Т.Т. тўхтатилиб, унга тегишли хўжалик қопи холислар иштирокида кўздан кечирилган.
Қоп ичидаги 3 дона темир қопламали автомобиль эҳтиёт қисмлари махсус воситалар ёрдамида бўлакларга ажратилганда, уларнинг ичига жами 7 кило 784 грамм олтин бўлаклари яширилганлиги маълум бўлди.
Баҳолаш хулосасига кўра, олтин қуймаларнинг умумий қиймати 12 миллиард 465 миллион 795 минг сўмни ташкил этди.
Ушбу шахс Тошкент шаҳридан юборилган олтинларни Қирғиз Республикасида қабул қилиб оладиган шахсга юк автотранспорт воситалари ҳайдовчилари орқали божхона назоратидан яширган ҳолда етказиши керак бўлган.
Ҳозирда унга нисбатан Жиноят Кодексининг 25,182-моддаси 2-қисми “а” банди билан жиноят иши қўзғатилиб, “қамоқ” эҳтиёт чораси қўлланилди.
