Шимолий Корея хакерлари 2025-йилда рекорд даражадаги 2 миллиард долларлик криптовалютани ўғирлади. Бу ҳақда блокчейн таҳлили билан шуғулланувчи Chainalysis компанияси ҳисоботига таяниб Bloomberg хабар берди.
Бу кўрсаткич 2024-йилга нисбатан кескин ошган. Ҳисоботга кўра, Шимолий Корея криптовалюталар хавфсизлиги борасида давлатлар орасида энг катта таҳдид бўлиб қолмоқда. Ўғирланган маблағларнинг катта қисми февраль ойида Bybit криптобиржасидан қўлга киритилган бўлиб, у криптовалюталар тарихидаги энг йирик рақамли ўғрилик сифатида қайд этилган.
“Криптовалюта ўғирлаш Шимолий Кореяни молиялаштиришнинг фойдали механизмига айланди. Ушбу хакерлик ҳужумларидан келадиган даромад режим ва унинг оммавий қирғин қуроллари дастурини қўллаб-қувватлайди”, деди Chainalysis компаниясининг миллий хавфсизлик разведкаси бўлими раҳбари Эндрю Фирман.
Ўғирланган маблағларни ювиш учун Шимолий Корея мураккаб усуллардан фойдаланади. Жумладан, блокчейнда тўловларни майда транзаксияларга бўлиб ўтказиш орқали уларни шубҳали операция сифатида аниқлаш эҳтимолини камайтиради.
2025-йилнинг январидан декабрь бошигача дунё бўйича криптовалюта ўғирликлари ҳажми 3,4 миллиард долларга етган. 2024-йилнинг биринчи ярмида кибержиноятчилар 1,58 миллиард долларни ўғирлаган бўлса, аввалги йилнинг шу даврида бу кўрсаткич икки баравар кам — 857 миллион долларни ташкил этган.
