Жорий йилнинг 19 ноябрь куни шимолий кореялик ҳарбийлар қисқа муддатга ҳарбий демаркация чизиғини кесиб ўтди. Бу ҳақда “Yonhap” хабар берди.
Қайд этилишича, бу чизиқ Корея яриморолини ажратиб турувчи демилитаризация зонаси, яъни Шимолий ва Жанубий Корея ўртасидаги амалдаги чегара ҳисобланади. Маълумотларга кўра, КХДР ҳарбийлари чегарада иш олиб борган. Уларнинг сони ва қуролланган ёки қуролланмагани юзасидан аниқ маълумот берилмаган. Жанубий Корея томони дастлаб огоҳлантириш берган, сўнг огоҳлантирувчи ўқ узган. Сеул вазиятга “кўрсатмаларга мувофиқ” муносабат билдирганини маълум қилган. Ўқ узилгач, Шимолий Корея ҳарбийлари ўз ҳудудига қайтган.
Шимолий ва Жанубий Кореяни демилитаризация зонаси ажратиб туради. Бу чегара бўйлаб жойлашган, кенглиги 4 километр бўлган ҳимояланган буфер ҳудуд бўлиб, унинг ҳар икки томонида ҳарбий мустаҳкам иншоотлар мавжуд. 2024 йил апрелидан буён Шимолий Корея ушбу ҳудуд бўйлаб танкларга қарши тўсиқлар ва миналар ўрнатиб келмоқда.
17 ноябрь куни Жанубий Корея Мудофаа вазирлиги Шимолий Кореяга чегара бўйича ҳарбий демаркация чизиғи юзасидан музокара ўтказишни таклиф қилганди. Бу таклиф эҳтимолий чегара бузилишларининг олдини олиш мақсадида илгари сурилган. Сабаби 1953 йилдан бери чегарани аниқлаштирувчи кўплаб белгилар шикастланган ёки яхши кўринмай қолган.
Жанубий Корея томони маълумотига кўра, 2025 йилда чегарани бузиб ўтиш билан боғлиқ қарийб 10 та ҳолат қайд этилган. Расмийлар бундай ҳодисалар чегарани қайта белгилашни тақозо этишини айтган.
