ИШИДга алоқадор исёнчилар Конгонинг Шимолий Киву провинциясида 89 нафар тинч аҳолини ўлдирди. Бу ҳақда БМТнинг Марказий Африкадаги тинчликпарвар миссияси (МОNUSCО)га таяниб, Al Arabiya хабар берди.
Расмий баёнотга кўра, ҳужумлар Шимолий Киву провинциясининг бир қанча ҳудудларида 13- 19 ноябрь кунлари оралиғида “Иттифоқдош демократик кучлар” (Allied Democratic Forces — ADF) жангарилари томонидан амалга оширилган. Ҳалок бўлган 89 киши орасида камида 20 нафар аёл ва болалар бор.
Шифохонага ҳужум ва талон-тарож
Таъкидланишича, ҳужумлардан бирида исёнчилар Бямбве шаҳарчасидаги Католик черкови томонидан бошқариладиган тиббиёт марказига ҳужум қилган. Улар бу ерда камида 17 кишини ўлдирган, жумладан, туғруқхонага келган аёлларни ҳам. Шунингдек, улар беморлар ётган тўртта палатани ёндириб юборган.
Баёнотда айтилишича, исёнчилар томонидан содир этилган бошқа қонунбузарликлар қаторига одам ўғирлаш ва тиббий анжомларни талон-тарож қилиш ҳам киради.
“МОNUSCО Конго расмийларини ушбу қирғинларни содир этганлар ва уларга шерик бўлганларни аниқлаш ҳамда уларни жавобгарликка тортиш учун мустақил ва ишончли тергов ишларини зудлик билан бошлашга чақиради”, дейилади баёнотда.
АDFнинг авж олаётган ҳужумлари
Октябрь ойида АDF исёнчилари Шимолий Киву провинциясидаги Мукондо қишлоғига тунда ҳужум уюштириб, 19 нафар тинч аҳолининг ҳаётига зомин бўлган эди. Сентябрь ойида эса АDF сўнгги ойлардаги энг қонли ҳужумларидан бири учун жавобгарликни ўз зиммасига олган — ўшанда Конгонинг шарқидаги жаноза маросимида 60 дан ортиқ тинч аҳоли вакили ҳаётдан кўз юмганди.
АDF дастлаб Угандада исёнчи куч сифатида ташкил топган, 1990-йилларнинг охиридан буён қўшни Конго ўрмонларини макон тутган. Бу гуруҳ ИШИД томонидан ўз филиали сифатида тан олинган. Конго армияси ва Уганда кучлари АDFга қарши операцияларни давом эттираётган бўлса-да, гуруҳнинг ҳужумлари тўхтамаяпти.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
