Наманган шаҳрида 31 ёшли эркак болаларга ноқонуний диний таълим бериб келгани аниқланиб, жиноят иши қўзғатилди. Бу ҳақда Давлат хавфсизлик хизмати хабар берди.
У 2025-йилнинг июнь ойидан бошлаб ойига 300 доллардан ижарага олинган хонадонда ҳужра ташкил қилиб, Наманган шаҳри ва вилоятнинг турли туманларида яшовчи 23 нафар болага ноқонуний равишда диний таълим бериб келган. Ўзи ижтимоий тармоқлардаги номаълум сайтлардан мустақил равишда диний тушунчаларни ўрганган, лекин ҳеч қандай диний маълумотга эга бўлмаган.
Мазкур ҳужрада диний таълим олаётган болаларнинг 10 нафари етти ёшгача, 13 нафари етти ёшдан катта бўлиб, жорий йилда умуман мактаблардаги дарсларга қатнашмаган. Ўқитувчилари ёки мактаб маъмурияти томонидан уларни дарсларга қайтариш бўйича чора-тадбирлар белгиланмаган.
Хусусан, болалардан бири Давлатобод туманида яшовчи фуқаронинг ўғли бўлиб, 5-синфда ўқиши лозим бўлса-да, ҳозирги вақтга қадар умуман мактабга бормаган. У билан суҳбатлашилганда мактаб ва у ердаги дарслар тўғрисида тушунчага эга эмаслигини айтган.
Мактаб ёшидаги болаларнинг ота-оналари мактаб маъмурияти билан ўзаро келишган ҳолда, уларни мавжуд электрон тизимдан назоратдан чиқариб юборган. Улар фарзандларининг дарсларга бормаганини яшириш мақсадида ўқиш жойларини тез-тез ўзгартириб келган.
Ҳозирда ноқонуний диний таълим берган шахсга нисбатан жиноят иши қўзғатилди. Болаларнинг ота-оналари 47-модда (болаларни тарбиялаш ва уларга таълим бериш борасидаги мажбуриятларни бажармаслик) асосида маъмурий жавобгарликка тортилди. Хабарда қайд этилишича, мактаб раҳбарлари ва ўқитувчилари қилмишлари Жиноят кодексининг 228-моддасига (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) кўра жавобгарликка сабаб бўлиши мумкин ва масъулиятсизликлари учун улар қонун олдида жавоб беради.
Жорий йилнинг август ойида ҳам Наманганда ҳужралар ташкил этиб, диний таълим бериш йўли билан даромад топаётганлар ушланганди. Тошкент шаҳрида ҳам ноқонуний диний таълим берилган хонадон аниқланганди. 48 ёшли эркак 10 нафар болага ноқонуний диний таълим бериб, эвазига ҳар биридан 100 доллар ҳамда егулик учун озиқ-овқат маҳсулотларини талаб қилган. Ҳуқуқ-тартибот органлари томонидан хонадонда текширувлар ўтказилиши эҳтимолини ҳисобга олиб, болаларни яшириш учун қўлбола ертўла қурдирган. Мазкур ертўла, яъни “қудуқ” темир қопқоқ билан ёпилиб, тош ва қум билан беркитилган. Бу билан у болаларнинг ҳаётини хавф остига қўйган.
