Туркия ҳуқуқ-тартибот идоралари мамлакатнинг 24 та провинциясида ИШИД гуруҳига қарши рейдлар ўтказди. Мамлакат Ички ишлар вазирлиги 20 апрель куни баёнот бериб, 90 нафар гумонланувчи қўлга олинганини маълум қилди. Бу ҳақда Daily Sabah хабар берди.
Вазирлик баёнотига кўра, рейдлар Жандармерия бош қўмондонлигининг терроризмга қарши кураш бошқармаси ва Бош прокуратура идоралари билан ҳамкорликда амалга оширилди. Жараёнда провинсиал жандармерия бўлинмалари бевосита иштирок этди.
Ҳибсга олинганлар орасида қуйидаги шахслар бор:
- ИШИД террорчи гуруҳи аъзолигида гумон қилинганлар;
- гуруҳ билан алоқадорликда гумонланаётган шахслар;
- ташкилотни молиялаштиришда айбланаётганлар;
- ижтимоий тармоқларда террорчиликни тарғиб қилган шахслар.
Вазирликнинг қайд этишича, ушбу операциялар ИШИДнинг одамларни ёллаш, тарғибот юритиш ва молиялаштириш тармоқларини йўқ қилишга қаратилган.
Анқара ИШИДни мамлакат хавфсизлиги ва тинчлигига энг катта таҳдидлардан бири деб ҳисоблайди. Туркия 2013 йилда ушбу гуруҳни биринчилардан бўлиб “террорчилик ташкилоти” деб эълон қилган давлатлардан ҳисобланади. Шундан бери мамлакатда бир қатор қонли терактлар содир этилган.
Масалан, 2015 йилда Анқара темир йўл вокзалидаги худкушлик ҳужуми оқибатида 100 киши ҳалок бўлган. 2017 йилнинг Янги йил кечасида Истанбулдаги тунги клубда отишма юз берган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
