Ўзбекистон олтин-валюта захиралари бир ойда 4,3 миллиард долларга, жорий йил бошидан бери қарийб 18,2 миллиард долларга ўсди.
Марказий банк таҳлилига кўра, жорий йил 1 ноябрда мамлакат олтин-валюта захиралари қиймати 59,3 миллиард доллардан ошган. Бундай юқори кўрсаткич республика тарихида илк бор кузатилмоқда.
Захираларнинг 47,8 миллиард доллари олтин ҳиссасига тўғри келади. Бу қиймат бир ой аввалгидан қарийб 3,6 миллиард долларга юқори.
Октябрь ойида республиканинг жами олтин захираси ҳажми 11,9 миллион трой унцияни (337,3 тонна) ташкил этган. Бу сентябрдагига нисбатан 300 минг унцияга (8,5 тонна) кўп. Бироқ 2025 йил бошида олтин захиралари ҳажми 12,3 миллион унция (433,8 минг тонна) эди.
Халқаро захираларнинг 10,9 миллиард доллари хорижий валютадаги активлар экани билдирилган. Мазкур захиралар ҳам октябрь давомида 731,4 миллион долларга кўпайган.
“Октябрда Ўзбекистон халқаро захиралари ҳажми 4,3 миллиард долларга ошди. Ой давомида олтин нархи 3 минг 806 доллардан 4 минг 13 долларгача кўтарилиши таъсирида захиралар 2,5 миллиард долларга бойиди”, дейилади Марказий банк изоҳида.
Жорий йил Ўзбекистон халқаро захиралари қиймати кескин ошиши билан бирга, мамлакат олтин экспорти ҳам рекорд ўрнатди. Хусусан, январь—сентябрь ойларида республика 9,9 миллиард долларлик олтин экспорт қилди (2024 йил мос давридагидан 70,9 фоизга кўп). Бу ўтган даврларда йиллик қийматда ҳам кузатилмаган тарихий максимум ҳисобланади.
