Туркиянинг Bayraktar Kizilelma дрони синовлар чоғида самолётни “ҳаво-ҳаво” ракеталари билан муваффақиятли уриб туширди. Бу жаҳон авиацияси тарихидаги илк ҳолат ҳисобланади. Бу ҳақда Anadolu хабар берди.
Синов Синоп шаҳридагии полигонда бўлиб ўтган. Дрон реактив двигательли юқори тезликдаги самолётни уриб туширган. У Kizilelma’га ўрнатилган радар томонидан аниқланган ва кузатилган.
Радар нишонни аниқ қайд этиши билан Kizilelma қанотдан “ҳаво-ҳаво” ракетасини ишга туширган.
“Нишон мутлақ аниқлик билан уриб туширилди”, дея таъкидлади ишлаб чиқарувчи.
Дунёда ишлаб чиқилаётган учувчисиз қирувчи самолётларнинг аксарияти ердаги объектларга зарба бериш учун мўлжалланган.
“Бошқа ҳеч бир учувчисиз платформа ҳавода объектга муваффақиятли зарба бера олмади. Kizilelma дунёдаги биринчи ва ягона учувчисиз платформа бўлиб, “ҳаво-ҳаво” зарбасини бериш қобилиятини намойиш этди ва авиация тарихида янги саҳифа очди”, дейилади хабарда.
Синовда Туркия ҳарбий-ҳаво кучларининг бешта F-16 қирувчиси иштирок этган. Улар Kizilelma билан сафда қўшма парвозни амалга оширган.
“Учувчисиз қирувчи самолёт илғор борт датчиклари, кўрмасдан туриб кўриш, ҳужумга учрамасдан туриб зарба бериш концепцияси туфайли душман самолётларини жуда узоқ масофадан аниқлай олади”, дейилади хабарда.
Baykar дунёдаги энг йирик дронлар ишлаб чиқарувчиси бўлиб, 37 та давлат билан экспорт шартномалари тузган.
