Тошкент шаҳрида норасмий никоҳдаги хотинини ўлдириш учун қотил ёллаган шахс ушланди. Бу ҳақда пойтахт Ички ишлар бош бошқармаси хабар берди.
У ўз турмуш ўртоғи – 1989 йилда туғилган аёлни ўлдириш кераклигини айтиб, ёлланма қотилга келишилган 10 минг доллардан 2 минг долларини берган. Иш тўлиқ амалга ошганидан сўнг, яъни аёл ўлдирилгач, қолган пулларни беришни ваъда қилган.
Буюртмачи ёлланма қотилга аёлнинг яшаш манзили, хонадон рақами, автомобили, кимлар билан яшаши, қачон уйга кириб-чиқиши ҳақида батафсил маълумотларни тақдим этган.
Шу куни жиноят қидирув бўлими ходимлари жабрланувчининг ҳаётини сақлаб қолиш мақсадида унинг ўлими саҳналаштирилган махсус тадбирни амалга оширган.
Бу жараёнда олдиндан пухта ишлаб чиқилган тезкор режа ҳамда жабрланувчининг ҳамкорлиги муҳим аҳамият касб этган. Аёлни ўлдириш учун ёлланган шахс эса олинган тезкор маълумотлар асосида бироз аввал жиноят қидирув бўлими ходимлари томонидан тезкор қўлга олинган.
Натижада қотил жиноятни олдини олиш мақсадида ички ишлар органлари ходимлари билан ҳамкорлик қилган. Шундан сўнг жорий йилнинг 20 апрель куни ўтказилган тезкор тадбир давомида икки эркак кўришиб, қотил унга турмуш ўртоғини ўлдиргани ҳақидаги хабарни айтган.
Бу хабарни эшитган эркак 6,5 миллион сўм пулларини ҳамда жабрланувчи аёлнинг номида бўлган қора рангли Tracker русумли автомашинани қотилга топширган. Айнан шу вақтда жиноятчи далили ашёлар билан қўлга олинган.
Ҳозирда мазкур ҳолат юзасидан туман прокуратураси томонидан гумонланувчига нисбатан Жиноят кодексининг 97-моддаси (қасддан одам ўлдириш) билан жиноят иши қўзғатилган. Унга нисбатан қамоқ эҳтиёт чораси қўлланган, тергов ҳаракатлари давом этмоқда.
