АҚШ Президенти Дональд Трамп Россиянинг Иркутск вилоятида ўлат касаллиги тарқалган бўлиши мумкинлиги ҳақидаги маълумотларга муносабат билдириб, ўз ёрдамини таклиф этди. Бу ҳақда CNBC хабар берди.
Қайд этилишича, кеча, 5 октябрь куни Дональд Трамп Оқ уйда журналистлар билан суҳбатда ўлатни ўрганиш билан шуғулланувчи Иркутск илмий-тадқиқот институти ходими вафот этганидан сўнг Россияга ёрдам таклиф қилган.
“Биз ёрдам берамиз. Биз ҳамиша шу каби муаммоларга дуч келганларга ёрдам қўлини узатамиз”, дейди Трамп журналистларга.
У ушбу ҳодисани Россия расмийлари билан муҳокама қилмаганини айтган, аммо ўлатни “оғир касаллик” деб атаган.
“Илгари биз бу касалликни назорат қила олар эдик. Қандайдир тарзда бу микроблар тобора кучлироқ бўлиб бормоқда – улар худди армияга ўхшайди”, дея қўшимча қилган Трамп.
Шунингдек, телеканал АҚШ Давлат департаментидаги ўз манбасидан изоҳ олган.
“Биз Касалликларни назорат қилиш ва олдини олиш марказлари ҳамда бошқа идоралараро ҳамкорларимиз билан биргаликда вазиятни синчковлик билан кузатиб боряпмиз. Кўплаб тафсилотлар ҳозирча тасдиқланмаган. Биз Россия расмийларини ишончли маълумотларни тезкор ва очиқ равишда баҳам кўришга чақирамиз”, дейилади изоҳда.
Жаҳон соғлиқни сақлаш ташкилоти (ЖССТ) телеканал сўровига жавобан ўлим сабаби ҳозирча тасдиқланмаганини, таҳлиллар эса давом этаётганини маълум қилган. Ташкилот Россия расмийлари билан алоқада бўлиб турганини ва зарур бўлган тақдирда ёрдам таклиф этганини таъкидлаган, бироқ мавжуд маълумотлардан келиб чиқиб, аҳоли учун хавф даражасини паст деб баҳоламоқда.
