Фарғонада ер сабаб маҳалладошлари билан жанжаллашган эркак жавобгарликка тортилди. Бу ҳақда вилоят ИИБ ахборот хизмати хабар қилди.
Маълум бўлишича, жорий йилнинг 22 май куни Қува тумани “Султонобод” маҳалласида яшовчи фуқаро А.А. ўз яшаш ҳудудидаги болалар футбол майдонида ободонлаштириш ишларини олиб бораётган маҳалладошлари Л.Ҳ. ва Ҳ.А. билан жанжаллашган.
Бунга А.А.нинг ушбу ер майдонида 8 метр ҳаққи борлигини даъво қилгани сабаб бўлган. Шунингдек, у жамоат жойига совуқ қурол сифатида фойдаланиш мумкин бўлган пичоқ олиб келган.
Фуқароларнинг мурожаати асосида воқеа жойига етиб борган профилактика инспекторлари келишмовчиликни бартараф этган. А.А.дан совуқ қурол олиниб, тегишли тартибда расмийлаштирилган. Жанжал давомида ҳеч ким тан жароҳати олмаган.
Ҳозирда ҳуқуқбузар А.А.га нисбатан Маъмурий жавобгарлик тўғрисидаги кодекснинг тегишли моддалари билан ҳужжатлар расмийлаштирилиб, суд органига юборилган.
