Фарғонада қўшни мамлакатдан келган “Volvo” русумли юк автотранспорт воситасининг ғилдираклари орасидан қарийб 20 кило наркотик топилди. Бу ҳақда Давлат хавфсизлик хизмати хабар берди.
Маълум қилинишича, гиёҳвандлик воситалари контрабандасига қарши курашиш йўналишида ДХХ Чегара қўшинлари ҳарбий хизматчилари томонидан Фарғона вилояти Риштон тумани “Деҳқонобод” маҳалласида тезкор тадбир ўтказилди. Тадбир давомида юк машинаси ғилдираклари ичига хуфиёна тарзда яширилган наркотик моддаларни олаётган вақтларида 1974-йилда туғилган автомашина ҳайдовчиси ҳамда буюртмачи ҳисобланган Учкўприк туманида яшовчи, 2000-йилда туғилган шахс ушланди.
Автомашина ғилдираклари ичига жами 3 кило 408 грамм опий ва 16 кило 405 грамм гашиш моддалари яширилгани аниқланиб, тегишли тартибда расмийлаштириб олинди.
Шунингдек, ушбу ноқонуний ишга буюртмачи шахснинг 1980-йилда туғилган отаси ҳам алоқадор эканлиги аниқланиб, у ҳам просессуал тартибда ушланди.
Ҳозирда мазкур фуқароларга нисбатан Жиноят кодексининг 246-моддаси 2-қисми ва 25, 273-моддаси 5-қисми билан жиноят иши қўзғатилиб, қамоқ эҳтиёт чораси қўлланилди.
