Осиё тараққиёт банки Ўзбекистонга кичик бизнесни ривожлантириш учун 300 миллион доллар миқдорида қарз ажратишни маъқуллади. Маблағнинг учдан бир қисми имтиёзли шартларда берилади.
Ушбу иккинчи кичик дастур инклюзив молиялаштириш учун ҳуқуқий ва институционал асос яратиш бўйича биринчи дастурда бошланган ислоҳотларни чуқурлаштиришга қаратилган. Бунга микрокредитлар лимитини ошириш, микромолиялаштириш қоидаларини такомиллаштириш, Аёл тадбиркорларни молиялаштириш халқаро кодексига қўшилиш ва Ислом микромолия тизими учун норматив базани шакллантириш киради.
“ОТБ Ўзбекистоннинг янада инклюзив ва бозорга йўналтирилган молиявий тизимга ўтишини қўллаб-қувватлашдан фахрланади”, деган ОТБнинг Ўзбекистондаги доимий ваколатхонаси раҳбари Канокпан Лао-Арая.
Тегишли дастур доирасида “ҳозир сотиб олинг, кейин тўланг” каби янги молиявий хизматларни тартибга солиш ва рақамли молиявий назоратни кучайтириш орқали истеъмолчилар ҳуқуқларини ҳимоя қилишга қаратилган янги сиёсат чоралари жорий этилган.
Бундан ташқари, молия секторида гендер тенглиги сиёсатини қўллаб-қувватлаш, молиялаштиришда гендер квоталарини белгилаш ва жинс бўйича ажратилган маълумотлар асосида ҳисобот бериш тизими кенгайтирилган. Шунингдек, дастурнинг яна бир муҳим элементи — микромолия секторини таркибий трансформация қилиш экани ва буни депозит қабул қилувчи микромолия банкларини ташкил этиш орқали амалга оширилиши маълум қилинди.
Молиявий барқарорликни таъминлаш мақсадида хавфларни баҳолашга асосланган норматив-ҳуқуқий ва назорат базаси жорий этилмоқда. Ҳозиргача бундай банкларни ташкил этиш учун иккита дастлабки лицензия берилган.
2025-йилда ОТБ ва Ўзбекистон Республикаси ўртасидаги ҳамкорликка 30 йил тўлган. Ўзбекистон 1995-йилда ОТБга аъзо бўлган ва шу вақтдан бери банк мамлакатга давлат сектори учун 14,6 миллиард доллар миқдорида қарз, грант ва техник кўмак тақдим этган.
Дастур техник кўмак билан ҳам қўллаб-қувватланади, бу институционал салоҳиятни ошириш ва ислоҳотларнинг барқарорлигини таъминлашга хизмат қилади. Иккинчи кичик дастур 2025–2027-йилларга мўлжалланган учинчи кичик дастурни ўз ичига олган кенгроқ ёндашувнинг бир қисми бўлиб, у амалга ошириш салоҳиятини ва институционал инфратузилмани янада мустаҳкамлаши таъкидланди.
