“Лукойл”нинг хориждаги активларини Gunvor нефть трейдерига сотиш бўйича битимнинг бузилиши Россия компаниясининг 14 миллиард евролик активларини йўқотишига олиб келиши мумкин. Бу ҳақда Financial Times хабар берди.
Бу сумма “Лукойл” хориждаги шўба корхоналаридаги назорат пакетига эга бўлган улушларнинг минимал қийматини акс эттиради. Бундай баҳо компаниянинг Австриядаги халқаро бўлинмаси ва Нидерландиядаги шўба корхоналари ҳужжатларига асосланади.
АҚШ санкцияларга тушган “Лукойл” ва унинг шўба корхоналари билан операцияларни якунлаш учун 22 ноябргача вақт берган.
“Лукойл”нинг хориждаги эгалари аллақачон ўз активларининг улар жойлашган давлатлар томонидан мусодара қилинишига тайёрланяпти, дейди манба.
Дастлаб Gunvor компанияси “Лукойл”нинг хориждаги активларини сотиб олишни режалаштирган эди. Бироқ 7 ноябрь куни АҚШ расмийлари компаниянинг Россия раҳбарияти билан алоқаларини текширгач, ушбу битимни амалга ошириш учун лицензия беришни рад этди.
Gunvor компанияси 2000 йилда Торнквист ва Тимченко томонидан ташкил этилган. Тимченко Россия президенти Владимир Путиннинг энг яқин бизнес ҳамкорларидан бири сифатида танилган. Gunvor узоқ вақт давомида Россия нефтининг энг йирик хорижий сотувчиси бўлган.
Bloomberg ёзишича, санкциялар фонида Европада “Лукойл” активлари учун “ҳақиқий кураш” бошланган. Бир қанча давлатлар АҚШни нефтни қайта ишлаш заводидан фойдаланиш учун лицензия беришга чақирмоқда. Руминия ва Болгария шулар жумласидан.
Руминия президентининг иқтисодий маслаҳатчиси Раду Бурнете мамлакат “Лукойл” активларини сотиб олиш имкониятини истисно қилмади. Молдова ҳам “Лукойл”нинг Кишинёв аэропортидаги ёнилғи терминалини сотиб олиш таклифини илгари сурган.
Ўтган ҳафта “Лукойл” Ироқнинг “Ғарбий Қурна-2” конида форс-мажор ҳолатини эълон қилганди. АҚШ санкцияларидан сўнг Ироқ Россия компаниясига барча тўловларни тўхтатган. “Лукойл” ярим йил ичида вазият ўзгармаса, лойиҳадан чиқиши ҳақида огоҳлантирган.
“Ғарбий Қурна-2” — дунёдаги энг йирик нефть конларидан бири ва “Лукойл”нинг муҳим хорижий активларидан бири. “Ғарбий Қурна-2” 14 миллиард баррел захирага эга ва кунига 500 минг баррел нефть қазиб олади, деб таъкидлайди Reuters.
Ҳозирда “Лукойл”нинг Ироқдаги нефтдан олинадиган даромади банклар томонидан музлатилган. Компанияга ажратилган 4 миллион баррел нефть шаклидаги тўловлар ҳам бекор қилинган.
Кремльнинг таъкидлашича, халқаро савдо ва иқтисодий муносабатлар қоидалари нуқтайи назаридан “Лукойл” барча қонуний манфаатларига риоя қилиниши керак. Россия ҳукумати Ғарб санкцияларини ноқонуний деб ҳисобламоқда.
