Франция Қуролли кучлари 2027 йил ёзига қадар мамлакат тарихидаги биринчи роботлаштирилган жанговар бўлинмани тақдим этишни режалаштирмоқда. Бу ҳақда Lе Point нашри хабар берди.
Пендрагон деб номланган лойиҳа 2025-йилда ишга туширилган бўлиб, у Франция Мудофаа вазирлигининг мудофаа соҳасидаги сунъий интеллект агентлиги (АМIAD), Истиқболли жанговар ҳаракатлар қўмондонлиги (CCF) ва мудофаа саноати корхоналари ҳамкорлигида амалга оширилмоқда.
Лойиҳа доирасида ташкил этиладиган роботлаштирилган жанговар бўлинма таркибига 10–15 та ер усти жанговар роботи ва 60 га яқин дрон киради. Уларнинг ҳаракатини C2 Пендрагон сунъий интеллект тизими мувофиқлаштириб туради.
Лойиҳанинг тактик қисми учун масъул подполковник Кристофнинг таъкидлашича, асосий мақсад жанг майдонида инсонлар ҳаёти учун хавфни камайтиришдан иборат.
“120–130 нафар ҳарбийни хавф остига қўйиш ўрнига, жанг майдонига роботлар ва дронларни юборамиз. Уларни орқа ҳудудда турган тахминан 15 нафар ҳарбий масофадан туриб бошқаради”, деди у.
Ҳозирда лойиҳанинг синовлари Морбиан департаментидаги Сен-Сир-Коэткидан ҳарбий полигонида ўтказилмоқда. Мутахассислар ер усти роботлари ва дронларнинг ўзаро ҳамкорлиги, шунингдек, сунъий интеллект ёрдамида бир нечта платформани бир вақтнинг ўзида бошқариш имкониятларини синовдан ўтказмоқда.
Нашр маълумотига кўра, оғирлиги 2–3 тонна бўлган ер усти роботларининг аксарияти ички ёнув двигательи билан жиҳозланган. Ишлаб чиқувчиларнинг фикрича, бундай техника электр платформаларига нисбатан тезроқ хизматга қайтарилиши мумкин.
Дастлаб роботлардан ўқ-дори, озиқ-овқат ва бошқа зарур юкларни ташишда фойдаланилади. Кейинчалик уларни пулемётлар ҳамда масофадан бошқариладиган жанговар ўқ-дорилар билан жиҳозлаш режалаштирилган. Тизим таркибига узоқ вақт парвоз қиладиган разведка дронлари ва зарба берувчи учувчисиз аппаратлар ҳам киради. Шу билан бирга, ишлаб чиқувчилар қуролдан фойдаланиш бўйича якуний қарорни ҳар доим инсон қабул қилишини таъкидламоқда.
2027-йилда тажриба бўлинмаси намойиш этилганидан сўнг унинг жанговар қўлланиш доктринаси ишлаб чиқилади ва қўшимча синовлар ўтказилади. Лойиҳа муаллифлари ҳисоб-китобига кўра, битта роботлаштирилган жанговар бўлинмани ташкил этиш қиймати тахминан 10 миллион еврони ташкил этади.
