Москвада илк бор гуманоид роботлар ўртасида рамзий никоҳ маросими ўтказилди. Бу ҳақда RIA Novosti хабар берди.
Ғайриоддий тўй маросими кеча, 9 июль куни Москва шаҳрида Пушкин номидаги кутубхонада бўлиб ўтган. Никоҳдан офис ходими ва блогер робот Роберт ҳамда балерина робот Матильда ўтган. Улар аввалроқ Петербург халқаро иқтисодий форуми (ПМЭФ–2026)да жамоатчиликка таништирилган эди.
Тантанани олиб борувчи Мария Пантюхина маросимни очар экан, бу гуманоид роботлар ўртасидаги биринчи никоҳ эканини таъкидлаган.
“Хонимлар ва жаноблар, бугун биз ноёб воқеага – гуманоид роботлар Роберт ва Матильданинг биринчи никоҳ маросимига гувоҳ бўламиз. Уларни нафақат замонавий технологиялар, балки билимга интилиш, ривожланиш ва ҳамкорлик каби умумий қадриятлар ҳам бирлаштирди. Янги турмуш қурганларимизни қаршилайлик”, деган у.
Шундан сўнг роботлар бир-бирига садоқат қасамёдини қилган. Роберт Матильдага ҳаётнинг барча алгоритмларида ишончли шерик бўлишга ваъда берган бўлса, Матильда Робертни янги кашфиётларга илҳомлантириш ва ҳар бир вақт циклида уларнинг боғлиқлигини асрашга қасам ичган.
Кейинчалик уларнинг “уй ҳайвони” сифатида тақдим этилган Догматик номли робот-ит никоҳ билагузукларини олиб чиққан ва “келин-куёв” уларни ўзаро алмашган.
“Версияларнинг тўлиқ мослиги, тизимларнинг муваффақиятли синхронлашуви ва ҳар икки томоннинг розилиги асосида сизларни робот турмуш ўртоқлари деб эълон қиламан”, деган маросим якунида бошловчи.
Роботларни ишлаб чиққан IT-Imperial компанияси бош директорининг ўринбосари Анна Багдасаряннинг айтишича, бундай тадбирлар гуманоид робототехникасининг мураккаб технологияларига жамоатчилик эътиборини қаратиш ва роботлар инсонларга қандай фойда келтириши мумкинлигини кўрсатишга хизмат қилади.
“Постиндустриал жамиятда меҳнатни автоматлаштириш туфайли инсонларда маданият ва уйғунлик учун катта имкониятлар пайдо бўлишини кўрсатиш жуда муҳим. Бунда робототехника ҳам муҳим ўрин тутади”, деган Багдасарян.
