Кеча, 11 январь куни Эрон ҳукумати кўча намойишлари вақтида ҳалок бўлганлар хотирасига уч кунлик мотам эълон қилди. Бу ҳақда “Khaleej Times” хабар берди.
Расмийларнинг билдиришича, норозилик намойишларини бостириш чоғида 38 нафар ҳуқуқ-тартибот ходими ҳалок бўлган.
Баёнотда ҳукумат “АҚШ ва сионистик режимга қарши миллий қаршиликда жон берган шаҳидлар хотирасига” уч кунлик мотам эълон қилганини маълум қилган, яъни ҳокимият мамлакатда бўлаётган намойишларда АҚШ ва Исроилнинг қўли борлигини алоҳида таъкидлаган.
Эрон Президенти Масъуд Пезешкиён фуқароларни миллий қаршилик маршида иштирок этишга ва зўравонликни қоралашга чақирган. У мамлакатни беқарорлаштиришга уринишларга йўл қўймаслигини айтиб, оммавий норозиликларни уюштиришда АҚШ ва Исроилни айблаган.
Эронда норозилик намойишлари 2025 йил декабрь ойи охирида миллий валютанинг кескин қадрсизланиши ва нархларнинг тез ошиши фонида бошланган. Намойишчилар сиёсий тузумни ўзгартиришни ва 1979 йилда ағдарилган шоҳнинг ўғли Ризо Паҳлавийнинг ҳокимиятга келишини талаб қилмоқда. Ҳуқуқни ҳимоя қилиш ташкилоти маълумотларига кўра, норозиликлар бошланганидан буён камида 538 киши яраланган, улар орасида 48 нафар хавфсизлик кучлари ходими бор. 10,6 мингдан ортиқ киши ҳибсга олинган, мамлакатда эса уч кундан зиёд вақт давомида интернет ўчирилган.
Эслатиб ўтамиз, эронликлар сўнгги бир неча кун давомида қуролли тартибсизликлар пайтида ҳалок бўлган хавфсизлик кучлари аъзолари учун оммавий дафн маросимларида қатнашганди. Дафн маросимлари Шероз, Қум ва Ҳамадон шаҳарларида бўлиб ўтган.
