Давлат хавфсизлик хизмати ноқонуний миграцияга қарши курашиш йўналишида Ички ишлар органлари ходимлари ҳамкорлигида тезкор тадбирлар ўтказилганда хорижга ишга юборишни ваъда қилиб фирибгарлик қилган икки киши ушланганини маълум қилди.
Наманган шаҳридаги консалтинг фирма раҳбари 2001-йилда туғилган маҳаллий фуқаронинг ишончига кирган ҳолда танишлари орқали уни Жанубий Кореяга ишга юбориш эвазига 10 минг доллар талаб қилиб, олдиндан 1,5 минг доллар олган вақтида ашёвий далиллар билан ушланган.
Наманган шаҳрида фаолият олиб борувчи бошқа бир консалтинг фирма иш юритувчиси ўзининг танишлари орқали Тўрақўрғон туманида истиқомат қилувчи, 1998-йилда туғилган фуқарони Латвияга ишга юбориш эвазига 2 минг доллар олган вақтида ушланган.
Ҳозирда ҳар икки ҳолат юзасидан қонунбузарларга нисбатан Жиноят кодексининг 168-моддаси билан жиноят иши қўзғатилиб, тергов ҳаракатлари олиб борилмоқда.
“Ҳурматли фуқаролар, огоҳ бўлинг! Хорижга ишга юбориш билан боғлиқ турли хил шубҳали таклифларга алданиб қолманг. Бу борада Миграция агентлиги ва чет элга ишга юбориш бўйича тегишли лицензияга эга бўлган хусусий бандлик агентликларига мурожаат қилишингиз мақсадга мувофиқ”, дея огоҳлантирди ДХХ.
