Туркиянинг Истанбул шаҳридаги Пендик туманида ер остидаги сув резервуарида қурол ишлаб чиқариш учун мўлжалланган эҳтиёт қисмлари яширинган омбор топилди. Бу ҳақда “Hürriyet” хабар қилди.
Қайд этилишича, яширин омбор жойлашуви Истанбул полицияси томонидан жиноятчиларни дрон ёрдамида кузатиш орқали аниқланган.
Ўтказилган тинтувларда тўппонча ишлаб чиқаришда ишлатиладиган 3 092 та детал, 1 869 та затвор (қурол ичида ўқни жойлаш, отиш ва чиқариш жараёнини бошқарадиган механизм) ҳамда кўплаб қурол қисмлари топилган. Операция давомида 4 нафар гумондор қўлга олинган. Воқеа юзасидан тергов давом этмоқда.
Билдирилишича, бу омбор Туркияда шу каби операциялар доирасида бир мартада аниқланган энг йирик топилма ҳисобланади.
