Самарқанд шахрида икки нафар шахс ўзаро тил бириктириб, икки гектар ер майдонини 490 минг долларга сотишга уринди. Бу ҳақда Давлат хавфсизлик хизмати хабар берди.
Маълум бўлишича, Самарқанд шаҳрида яшовчи 1993 ва 1983 йилда туғилган шахслар ўзаро тил бириктирган. Сўнг 1983 йилда туғилган фуқаронинг турмуш ўртоғига иссиқхона ташкил қилиш учун ажратиб берилган 2 гектар ер майдонини харидорга 490 минг АҚШ долларига сотишини айтган ҳамда мансабдор танишлари орқали ушбу ернинг ҳужжатларини расмийлаштириб беришини ваъда қилиб, олдиндан 50 минг АҚШ доллари талаб қилган.
Ҳабарга кўра, ҳуқуқни муҳофаза қилувчи органлар томонидан ҳамкорликда ўтказилган тезкор тадбир давомида 1993 йилда туғилган шахс 50 минг долларни олган вақтида ашёвий далиллар билан ушланган.
Ҳозирда мазкур икки фуқарога нисбатан жиноят иши қўзғатилиб, тергов ҳаракатлари олиб борилмоқда.
Маълумот учун, ер участкаларини ажратиш ва сотиш фақатгина “E-AUKSION” электрон савдо платформаси орқали шаффоф ва қонуний тарзда амалга оширилади.
