Тошкент шаҳрида электр тармоқлари корхонасининг 2 нафар муҳандиси пора билан қўлга тушди. Бу ҳақда Давлат хавфсизлик хизмати хабар берди.
Қайд этилишича, Тошкент шаҳри туманларидан биридаги электр тармоқлари корхонасининг 2 нафар муҳандиси тижорат банк филиали биносида ўрнатилган электр ҳисоблагич нотўғри схема орқали тармоққа уланганлиги оқибатида электр энергияси хато ҳисобланаётганлиги бўйича далолатнома расмийлаштирган.
Улар электр ҳисоблагични тармоққа улаган МЧЖ раҳбаридан мазкур далолатнома бўйича ҳисобланган 400 млн сўм жаримани 65 млн сўмга тушириб бериш эвазига 8 минг АҚШ доллари талаб қилган.
Давлат хавфсизлик хизматининг Тошкент вилояти бўйича бошқармаси ва Иқтисодий жиноятларга қарши курашиш департаменти ходимлари томонидан ўтказилган тезкор тадбирда муҳандислар сўралган пул маблағини учинчи шахс орқали олган вақтида уларнинг ноқонуний ҳаракатларига чек қўйилган.
Ҳозирда уларга нисбатан жиноят иши қўзғатилиб, тергов ҳаракатлари олиб борилмоқда.
