Россия армияси Одесса вилоятини ўққа тутиш чоғида суюлтирилган газ ташиётган Туркия байроғи остидаги танкерга дрон билан зарба берди. Бу ҳақда Associated Press хабар берди.
Ҳужум 17 ноябрь, душанба куни Измаил портида ёнилғи туширилаётган пайтда содир бўлган ва зарбадан сўнг кемада ёнғин чиққан. Туркия Денгиз ишлари бошқармаси маълумотига кўра, бортдаги 16 нафар экипаж аъзоси тўлиқ эвакуация қилинган, жабрланганлар йўқ.
Ҳужум Украина президенти Владимир Зеленскийнинг АҚШдан суюлтирилган газ импорти бўйича келишувни имзолаганидан бир кун ўтиб юз берди. Қора денгиз бўйидаги Измаил Украинада импорт ва экспорт учун асосий портлардан бири ҳисобланади.
Ҳужум ортидан Руминия ҳукумати чегарага яқин жойлашган Чаталкёй коммунаси аҳолисини эвакуация қилишни бошлади. Фавқулодда вазиятлар департаменти кўрсатмасига биноан, ёнғин чиққан кемадан атиги бир неча юз метр масофада жойлашган Плауру қишлоғи аҳолиси кўчирилди
Коммуна раҳбари Tudor Чернега кеманинг “исталган вақтда портлаб кетиши мумкин”лигини айтди. Унинг сўзларига кўра, қутқарувчилар хавф сабаб “ҳар бир уйни текшириб чиққан”, одамлар ва ҳайвонларни олиб чиқиб, ҳудуддаги ҳаракатни тўхтатган.
Одеса вилояти ҳарбий маъмурияти раҳбари Олег Кипер Россия дронлари минтақанинг бир нечта шаҳарларига зарба бериб, энергетика ва порт инфратузилмасига зарар етказганини маълум қилган. Унинг айтишича, бир нечта ёнғинлар келиб чиққан, фуқаролик кемалари шикастланган, бир киши жароҳат олган.
