Бугун, 30 апрельга ўтар кечаси Украина дронлари Россиянинг Нижний Новгород вилоятидаги энг йирик портловчи моддалар заводларидан бирига ҳужум қилди. Бу ҳақда маҳаллий аҳолига таяниб, “Shot” хабар берди.
Маълум қилинишича, шаҳарнинг турли қисмларида тахминан 10 та портлаш овози эшитилган. Портлаш овозлари Нижний Новгород яқинида жойлашган Кстовонинг жанубий ва марказий қисмларидан ҳам чиққан, аммо вилоят ҳокимияти ҳужум ҳақида расман изоҳ бермаган.
“Astra” томонидан ўтказилган гувоҳларнинг видео ва фотосуратлари таҳлилига кўра, Дзержинскдаги дронларнинг нишони Свердлов заводи бўлган. Ҳужумдан кейин завод устида тутун кўтарилган. Дзержинскдаги Свердлов заводи Россиядаги энг йирик портловчи моддалар ишлаб чиқарувчилардан бири бўлиб, 100 йилдан ортиқ тарихга эга.
Хабарга кўра, у мамлакат ҳарбий-саноат комплексининг бир қисми бўлиб, стратегик аҳамиятга эга. Завод Киевнинг “Украинанинг ҳудудий яхлитлиги, суверенитети ва мустақиллигига путур етказадиган ёки таҳдид солувчи ҳаракатларни қўллаб-қувватлагани учун” санкциялар рўйхатига киритилган. Компания шунингдек, АҚШ, Европа Иттифоқи, Буюк Британия, Япония ва Швейцариянинг санкцияларига дучор бўлган.
Россия Мудофаа вазирлигининг хабарига кўра, ҳаво ҳужумидан мудофаа сигнализация тизимлари бир кечада Россия ҳудудлари устида 189 та Украина дронини тутиб олган ва йўқ қилган. Хусусан, дронлар Астрахан, Белгород, Брянск, Волгоград, Воронеж, Курск, Липецк, Нижний Новгород, Ростов, Рязань, Самара, Саратов, Тула ва Ульяновск вилоятлари устида кузатилган.
Аввалроқ ҳам Украина Қуролли кучлари ўз зарбаларини қурол ишлаб чиқариш учун хомашё етказиб бериши мумкин бўлган Россия кимёвий заводларига қаратган. 6 апрель куни Воронеж вилоятининг Россошь шаҳридаги “Минудобрения” заводига, 4 апрель куни эса Самара вилоятининг Толятти шаҳридаги иккита кимёвий завод – “Тольяттикаучук” ва “КуйбышевАзот”га ҳужум қилганди. 27 март куни “PhosAgro Group”нинг Череповец кимё кластери таркибига кирувчи “Апатит” АЖга дронлар ҳужум қилган. 25 февраль куни Смоленск вилоятидаги Дорогобуж заводига ҳужум уюштирилган, оқибатда етти киши ҳалок бўлган. 17 февраль куни Перм вилоятидаги “Метафракс Кемикалс” заводига дронлар ҳужум қилган. 7 февраль куни Твер вилоятидаги энг йирик кимё заводи бўлган Редкинский экспериментал заводига зарба берилган эди.
