Тошкент вилоятининг Чирчиқ шаҳрида фуқарога етказилган тан жароҳати бўйича ишни “босди-босди” қилмоқчи бўлган профилактика инспектори қўлга тушди. Бу ҳақда Давлат хавфсизлик хизмати хабар берди.
Қайд этилишича, Чирчиқ шаҳар Ички ишлар бошқармаси профилактика инспектори жорий йил февраль ойида 1990 йилда туғилган И.Саидов етакчилигидаги жиноий гуруҳ томонидан 1994 йилда туғилган фуқарога етказилган тан жароҳати бўйича ҳолатни “босди-босди” қилиб бериш эвазига ундан олган 2700 АҚШ долларидан муқаддам 1000 долларини жабрланувчига берган.
Давлат хавфсизлик хизматининг Тошкент вилояти бўйича бошқармаси ходимлари томонидан ўтказилган тезкор тадбирда профилактика инспектори жабрланувчига 300 АҚШ доллари берган вақтида ашёвий далиллар билан ушланган.
Ҳозирда унга нисбатан жиноят иши қўзғатилиб, тергов ҳаракатлари олиб борилмоқда.
Шунингдек, профилактика инспекторининг мазкур ноқонуний ҳаракатига алоқадор бўлган ҳамкасбини ҳам жиноят ишига жалб қилиш чоралари кўрилмоқда.
