Ижтимоий тармоқларда “Мусодара товарлар” номи билан давлат идораси номидан сохта канал очиб, фуқароларни алдаб юрган шахс ушланди. Бу ҳақда Давлат божхона қўмитаси хабар берди.
Маълум қилинишича, 2008 йилда Фарғона вилоятида туғилган шахс “Мусодара товарлар” деб номланган Telegram канали ва Instagram’да “мусодара_тавар_арзон” саҳифасини очган. Харидорлар ишончини қозониш учун эса канал ва саҳифа профилларида сохта лицензия, Давлат ҳавфсизлик хизмати ва божхона идораларининг расмий логотипларидан фойдаланган.
Шунингдек, ушбу шахс ўзи юритган каналлар орқали гўёки чет элдан келган ноқонуний товарлар божхона органлари томонидан мусодара қилингани ва шу сабаб 80% чегирма билан сотилаётгани ҳақида турли товарларнинг расми ва нархларини мунтазам эълон қилиб келган.
Маъмурнинг сохта эълонларига ишонган фуқаролар эса унинг банк пластик карталарига айтилган пулларни ўтказиб берган. Аммо кейинчалик ушбу фуқаролар қора рўйхатдан жой олган.
Қайд этилишича, ҳуқуқни муҳофаза қилувчи органлар билан ҳамкорликда пойтахтнинг Миробод туманида тезкор тадбир ўтказилган. Тадбир давомида “Мусодара таварлар” Telegram’ канали ва Instagram’даги “мусодара_тавар_арзон” саҳифасининг маъмури қўлга олинган. Ундан ҳолатга алоқадор бўлган ашёвий далиллар тегишли тартибда сақловга олинган.
Ҳозирда ҳолат юзасидан ушбу шахсга нисбатан жиноят иши қўзғатилиб, ҳозирда тергов ҳаракатлари олиб борилмоқда.
