АҚШ президенти Дональд Трамп ўз номи билан аталадиган стадионга эга бўлишни истамоқда. Бу ҳақда ESPN нашри хабар берди.
Хабарга кўра, Миллий футбол лигаси (NFL) вакили “Вашингтон Коммандерс” клуби учун 3,7 миллиард долларлик янги стадион қурилмоқда. У эски Роберт Кеннеди номидаги стадион ўрнида бунёд этилмоқда. Мазкур арена 1961-йилдан 1996-йилгача жамоанинг уй майдони бўлган. Янги иншоот 2030-йилда фойдаланишга топширилиши режалаштирилган.
Манбаларнинг маълум қилишича, клуб эгаларидан бири ҳисобланган Жош Ҳаррис бошчилигидаги инвесторлар гуруҳи ҳамда Трамп вакиллари ўртасида норасмий музокаралар ҳам ўтказилган.
“Бу президентнинг истаги ва катта эҳтимол билан бу амалга ошади”, дея хабар берди Оқ уй мансабдорларидан бири.
Оқ уй матбуот котиби Керолин Ливитт эса Трампнинг янги стадион қурилишига катта ҳисса қўшганини айтган:
“Бу ном стадион учун жуда мос бўларди, ахир айнан президент Трамп янги иншоот қурилишига катта ҳисса қўшган”.
Қайд этилишича, стадион номини расмий равишда туман кенгаши ҳамда давлат ерларини бошқарувчи федерал агентлик тасдиқлайди. “Коммандерс” жамоасининг ўзи бу қарорни мустақил қабул қила олмайди.
